На денешен ден во 2006 година нè напушти легендарниот Гоце Николовски, познат по еден од неговите најголеми хитови „Бисер Балкански“.

Николовски е роден во 1947 година во Скопје, а кариерата ја започнува на 16 години, додека живеел во Ниш, како победник во тогаш популарната емисија „Максиметар“ со што ја навестува својата музичка кариера.

Почнува во групата „Рубинси“, но многу брзо преминува во тогаш најпопуларната нишка поп-рок група „Далтони“, а нивната песна „Рука од сна“ и денес често може да се чуе на нишките радиостаници.

Својата популарност како музичар и пејач во Македонија ја достигнува во 1990 година кога на „Фолк фест Валандово“ за првпат ја изведува легендарната македонска песна „Бисер балкански“. Песната ја доби првата награда на фестивалот, по што стана голем хит и широко прифатена од македонската публика и од македонскиот народ воопшто. Со оглед на тоа дека е отпеана во времето на распадот на Југославија, Македонците ја прифатија како симбол на својата независност и сувереност, а во дијаспората честопати беше изведувана како македонска химна.

Гоце често беше нарекуван и бисер балкански, по името на својата песна. Низ годините, Гоце Николовски издаде и неколку други песни како „Серенада‘, „Приказна за Ангелина“, „Запејте сите ангели“, „Бисера“, „Песна од земја далечна“.

Неговата популарност беше особено голема во Австралија и Канада. Поради придонесот за македонската заедница во Австралија, Николовски бил прогласен за почесен граѓанин на Аделаида, а градоначалникот на овој град му доделил почесен „клуч на градот“, а повеќето ТВ и радиостаници од Македонија и дијаспората посмртно му доделија награди за животно дело.

Неговиот голем хит „Бисер балкански“ во 2000 е прогласен за песна на векот во Македонија. Поради својот придонес за македонската народна музика, Гоце Николовски спаѓа во редот на најголемите музички имиња во македонската историја.