Неизложени дела на Глигор Чемерски ќе бидат претставени со изложбата „Чемерски: Низ цртеж, отпосле“ во МКЦ

Дело од изложбата „Чемерски: Низ цртеж, отпосле“ во МКЦ

Галерија „Грал“ и Младинскиот културен центар (МКЦ) во Скопје ја организираат изложбата „Чемерски: Низ цртеж, отпосле“ на реномираниот македонски уметник и академик Глигор Чемерски. Отворањето на изложбата е на 24 јуни, во 20 часот, во галеријата на МКЦ, а истата ќе биде поставена до 9 јули оваа година.

Во текот на 1980-тите и на почетокот на 1990-тите, Чемерски често престојуваше во Париз, каде што беше застапуван од галеријата „Galerie du Fleuve“ (1983 – 2003). Постојано присутен на тамошната ликовна сцена, во тој период Чемерски реализираше повеќе изложби во таа галерија.

Најголем дел од цртежите и гвашевите претставени на оваа изложба се неизложувани дела, интимни формати од колекцијата на „Galerie du Fleuve“, создадени во тој период.

Дело од изложбата „Чемерски: Низ цртеж, отпосле“ во МКЦ

Глигор Чемерски (1940 – 2016) е сликар, графичар, мозаичар. Еден од најплодните македонски модерни автори, неговите дела се застапени во голем број галерии и музеи во земјата и надвор од неа. Добитник е на голем број награди и признанија.

Чемерски работел и како ликовен есеист и критичар, телевизиски уредник, сценограф и костимограф. Автор е и на повеќе монументални дела: „Топла Земја“ (1971, фреска, Стопанска Банка, Скопје), „Човекот и светлината“ (1975, мозаик, ХЕЦ Вруток), „Споменик на слободата“ (1981, меморијален мозаички комплекс, Кочани), „Македонија – светла земја“ и „Македонија – земјата памети“ (2006, мозаици, Кабинет на Претседател на Република Северна Македонија, Скопје) итн.

Живеел и работел на релација Скопје – Белград – Париз. Бил член на Македонската академија на науките и уметностите и почесен член на Руската академија на уметностите.

Куратор на изложбата во МКЦ е м-р Елена Чемерска. Изложбата е поддржана од Министерството за култура на Република Северна Македонија, „Јуроп хаус Скопје“ и винарија „Попов“.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 100 ДЕНАРИ

Видео на денот