Популарното езерско капалиште Хајдебад во германскиот град Хале воведе правило според кое нема да им биде дозволен влез на посетители кои не разбираат доволно германски јазик за да ги следат упатствата и безбедносните правила.

Директорот на капалиштето, Матијас Нобел, изјави дека мерката е воведена исклучиво од безбедносни причини.

„Мораме да бидеме сигурни дека гостите ги разбираат правилата на капалиштето за доследно да можеме да ја обезбедиме нивната безбедност“, изјави Нобел за германската новинска агенција ДПА.

Доколку вработените на влезот забележат дека комуникацијата со посетителите е отежната, тие ќе одлучуваат за секој случај поединечно. Според Нобел, сите посетители мора да ги разбираат правилата за однесување во водата и предупредувањата на спасувачите.

Одлуката предизвика критики, но директорот нагласи дека капалиштето нема да отстапи од новото правило.

Во деновите на екстремно високи температури, кога капалиштето било преполно, управата поставила дополнителни предупредувања и ограничувања. Оттогаш, на влезот биле вратени неколку посетители.

Повод за воведувањето на мерката бил инцидент од минатиот викенд, кога Нобел, кој е и спасувач, морал да извлече мало дете од длабока вода.

„Езерото е длабоко до 13 метри. За многумина тоа е едноставно премногу опасно“, рече тој.

Тој нагласи дека особено децата мора да ги разбираат ограничувањата и постојано да бидат под надзор на возрасни лица кои исто така ја разбираат опасноста и можат да реагираат доколку спасувачите им се обратат.

Нобел додаде дека обезбедувањето станува особено претпазливо кога на влезот ќе пристигне група возрасни без ниту едно лице што доволно добро зборува германски јазик.

„Нема време за апликации за преведување. Персоналот и онака е преоптоварен“, заклучи тој.