Претседателот на Европскиот Совет (ЕС), Шарл Мишел денеска на својот блог напиша дека Обединетото Кралство целосно забрани извоз на вакцини и компоненти за вакцини на што официјален Лондон остро реагира.

Мишел на својот блог денеска се осврна на состојбата со вакцинацијата во ЕУ и обвинувањата за „вакцински национализам”, откако Италија забрани извоз на дози кон Австралија. Тој потоа напиша дека Обединетото Кралство и САД, за разлика од ЕУ, „имаат целосна забрана за извоз”.

Од британската влада денеска бурно реагираат и велат дека Лондон не блокирал извоз на ниту една вакцина против ковид-19 и дека изјавите за британска забрана за извоз “се целосно невистинити”.

Новинарите во Брисел побараа одговор од прес службата на Мишел каде тој ги црпи овие информации, но за сега оттаму нема одговор.