Не е прифатена оставката, Васоски останува тренер на ФК Академија Пандев
Во неделата во рамките од 13 коло во Првата македонска фудбалска лига екипата на Академија Пандев на домашен терен загуби со 0:2 од Работнички.
„Пандевци“ бележат лоши резултати во шампионатот сезонава, имаат само две победи, последната ја имаа во август. Моментно се на претпоследното место со осум бодови, само три повеќе од „фенерџијата“ Скопје.
Не издржа ни два месеци на тренерската клупа, Александар Васоски си поднесе оставка по поразот од „романтичарите“.
Истата денеска не е прифатена, стои во денешното соопштение на ФК Академија Пандев до јавноста:
– На денешниот состанок на Управниот Одбор на клубот, беше разгледена понудената оставка од страна на Шефот на стручниот штаб на сениорскиот тим – Александар Васоски. Сакаме да ја информираме јавноста дека понудената оставка не е прифатена. Управниот Одбор смета дека Александар Васоски е еден од најдобрите тренери во Македонија и дека тоа и ќе го докаже во наредниот период. Дадена му е целосна поддршка во сите одлуки кои смета да ги спроведе во иднина, за враќање на победничките патеки. Во минатото клубот се соочуваше и со подолги резултатски кризи, но на крај секогаш преку единство и сплотеност доаѓаше до остварување на зацртаните цели, затоа сметаме дека прифаќањето на оставката не е правото решение – објавија од клубот.