Научниците испечатија човечка кожа со целосна структура: Го забрзува регенерирањето и заздравувањето на раните
Новата студија на Институтот за регенеративна медицина „Вејк Форест“ претставува значајно откритие во областа на регенерација на кожата и заздравување на раните.
Студијата покажува успешен развој на биопечатена кожа која го забрзува заздравувањето на раните, поддржува здраво ремоделирање на екстрацелуларната матрица и дава оптимизам за целосно закрепнување, пишува „Atrium Health Wake Forest Baptist“.
Регенерацијата на кожата долго време е предмет на проучување со надеж дека на жртвите од изгореници, ранетите воини и на луѓето со кожни заболувања ќе им се даде шанса за целосно заздравување. Достапните транспланти често се привремени, или ако се трајни – имаат само некои елементи на нормална кожа, кои често имаат изглед на лузна.
Создавањето кожа со целосна структура досега не беше возможно. Оваа студија вклучува биопечатење на сите шест главни типови човечки клетки присутни во кожата со специјализирани хидрогели како биоврзница.
Повеќеслојната структура на целосна кожа е направена со сите три слоја присутни во нормалното човечко ткиво, имено епидермисот, дермисот и хиподермисот. По трансплантацијата во претклинички услови, биопечатената кожа формирала крвни садови, обрасци на кожата и нормална ткивна структура.
Дополнителните испитни групи покажаа подобрено заздравување на раните, намалена контракција на кожата и зголемено производство на колаген за да се намалат лузните.
Користејќи ја постоечката технологија за биопечатење, научниците покажаа дека е можна целосно функционална регенерација на кожата. Биоинженерните кожни графтови обезбедуваат трислојна структура за целосен третман на раните.