Научниците бараат непознати сорти грозје во Србија. Првите резултати од истражувањето се очекуваат до крајот на годината, што би можело да придонесе за реконструкција на винската историја на Србија и откривање на стари, заборавени сорти грозје што некогаш се одгледувале низ целата земја- пренесува Политика. 

Се очекува генетската анализа да открие непознати сорти и нивна евентуална ревитализација и враќање во комерцијално производство. Еден од интересните примери е лозата покрај црквата на Рачкиот манастир, за која се претпоставува дека е таму повеќе од два века, како и лозата пред старата зграда на кнежевството во Неготин.

Исто така, се нагласува дека Србија не може да се натпреварува на глобалниот пазар со вино произведено од меѓународни сорти како што се „шардоне“ или „каберне“, туку со развивање на автентичен домашен асортиман.

Целта е да се утврди кои клонови покажуваат најголема отпорност на болести и климатски промени, како и кои се најдобри за производство на премиум вина.