Најпродаван албум на сите времиња: 40 години од „Трилер“, ремек-делото на Мајкл Џексон
Кралот на поп-музиката Мајкл Џексон го објави албумот „Трилер“ на утрешен ден, 30 ноември, пред точно четири децении. Имено, не само што се работи за неговиот најпознат албум, туку е и најпродаваниот музички албум на сите времиња, со проценка од 65 до 110 милиони продадени копии.
„Трилер“ доживеа огромен успех и беше на врвот на табелата „Билборд 200“ цели 37 недели, како и во топ 10 во 80 последователни седмици. Седум песни од албумот беа издадени како синглови и сите влегоа меѓу првите десет на топ-листата „Билборд хот 100“.
Исто така, овој албум oсвоил рекордни осум Греми награди во 1984 година, вклучувајќи ја наградата за „Албум на годината“, а песната „Beat It“ била прогласена за „Песна на годината“.
И покрај бројните контроверзии низ годините, Џексон и ден-денес е популарен, а неговата музика се „стримува“ повеќе од 35 милиони пати месечно на музичките платформи како Спотифај.
View this post on Instagram
Овој музички проект го постави Џексон меѓу доминантните поп-ѕвезди на крајот од 20 век и му овозможи да ги сруши расните бариери. Ова е еден од првите музички албуми кои ги искористи спотовите како успешни промотивни алатки, а видеозаписите за песните „Thriller“, „Billie Jean“ и „Beat It“ и ден-денес се прикажуваат на музичките телевизии.
Сепак, и покрај големиот успех на албумот на топ-листите, Џексон првично не успеал да се пробие на музичката телевизија „Ем-ти-ви“. Уредниците на телевизијата не сакале да го емитуваат видеозаписот за песната „Billie Jean“, со оправдување дека музиката на црнците „не се вклопува“ во програмата на „Ем-ти-ви“, на која доминирала рок-музика и музика која ја прават белци.
Изреволтиран од ситуацијата, шефот на издавачката куќа „Си-би-ес“, Волтер Јетникоф се заканил дека јавно ќе ја осуди „Ем-ти-ви“ како расистичка телевизија и дека ќе им забрани на сите свои изведувачи, вклучувајќи ги и рокерите, да се појавуваат таму.
Јетникоф ја добил битката со „Ем-ти-ви“, но потоа влегол во конфликт и со самиот Џексон бидејќи музичарот му побарал милион долари за снимањето на видеозаписот за „Трилер“. Џексон сакал да соработува со познатиот филмски режисер Џон Лендис, а Јетникоф сметал дека целата идеја немала смисла бидејќи албумот веќе долго време бил на првото место на топ-листите.
Сепак, Џексон ја изреализирал својата идеја и снимил високо квалитетен видеозапис со времетраење од 14 минути, кој бил премиерно прикажан во киносала пред десетици познати личности во Холивуд. Останатото е историја.