Екипата на Трабзонспор покажува сериозен интерес за еден од најистакнатите фудбалери во Првата македонска фудбалска лига, Роџерс Мато, за кого Вардар постави цена од 1,5 милиони евра.

Според информациите на турските медиуми, скаутската служба на турскиот гигант доставила позитивен извештај, а поддршка за евентуален трансфер дал и тренерот Фатих Теке, кој во офанзивецот по крило гледа големо засилување за својот тим.

Во меѓувреме, вардарци одбија понуда тешка 350.000 евра од шкотски Хартс и официјално потврдија дека во договорот на Мато е вметната откупна клаузула од 1,5 милиони евра.

Медиумите во Турција најавуваат дека Трабзонспор е подготвен да ја исполни финансиската побарувачка, па во наредниот период се очекуваат поконкретни активности околу трансферот.

Доколку зделката се реализира, Мато ќе стане најскапо продадениот фудбалер во историјата на македонското првенство.