Надежите ремизираа со Црна Гора
Репрезентацијата на Македонија до 19 години одигра нерешено 1:1 против соодветната селекција на Црна Гора во рамките на вториот контролен меч одигран на тренинг центарот „ Петар Милошевски “.
Избраниците на селекторот Влатко Гроздановски одлично го започнаа натпреварот, беа подобар противник и пропуштија неколку добри прилики за постигнување гол во првите 30 минути од средбата. Во 36’ добрата игра нашата репрезентација ја круниса со погодок и водство од 1:0.
Стрелец на голот за Македонија беше Бехар Фета. Во продолжението Црна Гора притисна, нашите фудбалери се повлекоа и сето тоа резултираше со погодок во нашата мрежа. Стрелец на израмнувачкиот гол беше Виктор Џукановиќ во 80’. Воедно тоа беше и конечниот резултат на оваа средба. Во 87’ Aнтонио Мирков пропушти голема прилика да и донесе победа на нашата селекција. За потсетување дека и на овој натпревар младата репрезентација на Македонија беше ослабната со неиграњето на неколку стандардни првотимци.