Васка Илиева, една од најголемите и највлијателни македонски пејачки, почина на денешен ден во 2001 година, оставајќи зад себе неизбришлива трага во македонската музичка историја.

Родена на 21 декември 1923 година во Скопје, Васка Илиева уште од најрана возраст била опкружена со музика. Нејзиниот татко бил познат гајдаџија, а љубовта кон народната песна ја одвела на сцената каде што подоцна ќе стане симбол на македонскиот фолклор.

Својата кариера ја започнала во Државниот ансамбл за народни песни и игри „Танец“, каде брзо се истакнала со својот специфичен вокал и автентичен стил. Набргу потоа станала омилена кај публиката, настапувајќи низ цела Македонија, поранешна Југославија, но и пред македонската дијаспора ширум светот.

Нејзиниот репертоар остави длабока трага, а меѓу најпознатите песни се „Земјо македонска“, „Имала мајка“, „Излегол Невен Пејо“, „Аир да не сториш мајко“ и „Сестра кани брата на вечера“.

Поради својот неповторлив глас и интерпретација, со години ја нарекуваа „жива легенда“, „кралица на македонската народна песна“ и „амбасадор на македонската музика“.

Васка Илиева почина на 4 мај 2001 година во Скопје, на 77-годишна возраст. Зад себе остави богато културно наследство кое и денес живее преку нејзините песни.