Кошаркарите на МЗТ Скопје го претрпеа и шестиот пораз во седмиот меч по враќањето во АБА лигата, вечерва белградски ФМП беше подобар со 97:101.

Момците на Петровиќ одиграа фантастично и со серијата од 21:5 дојдоа на само еден поен негатива (96:97). Мајк Кофи имаше шанса од слободни фрлања да го изедначи резултатот, меѓутоа реализираше само едно и тогаш згаснаа сите надежи за некакво изненадување.

Не го издржа МЗТ брзиот ритам на противникот кој сезонава е најпријатното изненадување во регионалното натпреварување. ФМП е второпласиран со скор од 6-1. Фуризно го започнаа домаќините натпреварот и по неколку минути водеа со 13:2. Кон средината на вториот период ФМП дојде до предност од 14 поени (55:41).

Тогаш изгледаше дека ФМП мирно ќе го приведе натпреварот кон крајот, меѓутоа македонскиот претставник започна да игра многу подобро и направи серија од 16:0 со која на стартот од второто полувреме првпат поведе со 57:55.

Сепак, тој налет како да ја потроши целата сила на МЗТ, ФМП повторно заигра агресивно и во период со 22:4 ја врати убедливата предност. Кофи и Страхиња Миковиќ со по 18 поени беа најефикасните кај МЗТ, додека Паулис Валинскас со 19 поени го предводеше ФМП.