Мувлата најчесто се развива на влажни места каде што има многу остатоци од сапуница со кои може да се „храни“.

Машината за перење алишта секојдневно е во контакт со влага, детергенти и нечистотии, што ја прави идеално место за развој на мувла и бактерии. Иако изгледа дека уредот се чисти сам за време на перењето, остатоци од вода и сапуница често се задржуваат во барабанот, гумата околу вратата и фиоката за детергент, создавајќи непријатни мириси и потенцијални здравствени проблеми доколку не се одржува редовно.

Многу луѓе не сфаќаат дека машините за перење можат да станат жаришта на бактерии и мувла. Тие постојано се изложени на голема количина влага, а ретко се чистат темелно, што создава поволни услови за развој на спори од мувла. Таа најчесто се појавува на влажни површини богати со остатоци од детергент, а доколку не се отстрани навреме, може да го скрати работниот век на машината и да создаде леплива наслага што лесно се пренесува и на облеката.

Сепак, Ијан Палмер-Смит, експерт за водоинсталатерство од компанијата „Доместик енд Џенерал“, открива дека спречувањето на мувлата во машината за перење е едноставно. Според него, доволно е да одвоите една минута по секое перење и да ја избришете фиоката за детергент, пишува „Дејли експрес“.

„Вишокот детергент со текот на времето создава наслага што привлекува мувла. Олеснете си ја работата и исплакнете ја фиоката веднаш штом ќе забележите талог, пред проблемот да стане сериозен“, советува тој.

По перењето, фиоката за детергент обично е влажна, топла и покриена со остатоци од омекнувач – совршена комбинација за развој на мувла. Бактериите и мувлата брзо се таложат и создаваат лизгава и тврда наслага, која секојпат повторно се враќа во машината при следното перење.

Четири одлични трикови за враќање на белата боја на пожолтената облека: Еве како да ги спасите омилените парчиња!