Украинскиот претседател Володимир Зеленски изјави дека му понудил на рускиот претседател Владимир Путин да се сретнат на самитот на Г7 во Франција оваа недела или дури во САД, со цел да разговараат за завршување на четиригодишната војна, јавува Ројтерс.

Зеленски, говорејќи во историски манастир во Киев кој беше оштетен во руски напад во текот на ноќта, изјави дека САД се согласиле Путин да биде поканет на собирот што започнa вчера во Евијан ле Бен.

„Испративме порака дека сме подготвени да се сретнеме со Путин за време на Г7, бидејќи таму се Трамп и Макрон, значи Европа плус Америка. Мислам дека тоа е добра, многу добра можност сите да се сретнеме заедно. Европа и САД беа согласни, а Русија повторно покажа дека не е подготвена за разговори“, рече Зеленски.

Подоцна, во објава на Телеграм, Зеленски напиша дека во телефонски разговор во неделата му предложил на американскиот претседател Доналд Трамп тој и рускиот претседател да се сретнат во САД.

„Вчера разговаравме со претседателот Трамп дека таква средба би можела да се организира во САД во формат што би му отежнал на Путин да одбие, барем да го одбие претседателот Трамп. Ќе видиме што ќе произлезе од ова. Ако Русија ја одбие и оваа можност, ќе биде потребен поголем притисок“, напиша тој.

Украински функционер изјави дека Зеленски за предлогот ги информирал американските претставници и францускиот претседател Емануел Макрон. Украина исто така директно ја доставила поканата до руските претставници, но не добила јасен одговор.

Кабинетот на Макрон не одговорил веднаш на барањето за коментар.

Во отворено писмо до Путин овој месец, Зеленски понуди директни разговори лице в лице и посочи дека војната сè повеќе ја оптоварува руската економија. Како одговор, Путин јавно изјави дека не гледа причина за таква средба и дека украинските напади со дронови од долг дострел не претставуваат економска закана.

Најмалку 10 лица загинаа пред два дена во рускиот напад врз Киев и североистокот на Украина.

Украина, пак, вчера погоди два моста што го поврзуваат делот од украинската Херсонска област под руска контрола со Крим. Синоќа гореше и нафтен склад откако падна дрон.

Русија изврши бран напади врз Украина, загинаа девет луѓе — оштетен е Манастирот на пештерите

ВИДЕО: Дрон падна во рускиот Краснодарски Регион, се запали складиште со нафта