Хамас го поздрави објавениот договор меѓу Соединетите Американски Држави и Иран и изрази надеж дека тој ќе придонесе за запирање на израелските напади врз Појасот Газа и Либан, пренесува „Тајмс оф израел“.

Во соопштение, групата наведе дека се надева оти договорот меѓу Вашингтон и Техеран ќе има позитивно влијание врз регионалните прашања и ќе создаде услови за ставање крај на тековните конфликти.

„Се надеваме дека овој договор ќе претставува чекор што ќе придонесе за зајакнување на регионалната стабилност и позитивно ќе се одрази врз различните регионални прашања, пред сè преку итен прекин на тековната ционистичка агресија врз нашиот палестински народ во Појасот Газа, како и ставање крај на повторените напади и прекршувања врз Либан и сите други фронтови“, се додава во соопштението.

Хамас истакна и дека безбедност и стабилност во регионот нема да бидат можни сè додека Израел ја продолжува војната против Палестинците.

Групата дополнително го обвини Израел дека продолжува да убива, да изгладнува и да раселува Палестинци, и повика на прекин на овие дејствија.

Неодамнешниот договор меѓу Соединетите Американски Држави и Иран беше поздравен од повеќе регионални и меѓународни актери, кои изразија надеж дека ќе придонесе за намалување на тензиите и за зајакнување на стабилноста во целиот регион.

Америка и Иран ќе го потпишат договорот за крај на војната на 19 јуни во Швајцарија