Почина Ан Шедин, ѕвездата на хит-серијата „АЛФ“
Ан Шедин, актерката најпозната по улогата на мајката на Кејт Танер во хит-серијата од 80-тите „АЛФ“, почина на 77-годишна возраст. Веста за нејзината смрт ја потврди семејството, кое во неделата објави на Фејсбук дека актерката „починала мирно“, но причината за смртта не е наведена.
Препорачано
„Таа остава зад себе извонредно наследство од креативна енергија, остар хумор и радоста што ја наоѓаше во семејството. Обожаваше мали кучиња, страсно купуваше во продавниците за половни работи и сакаше добри приказни, а исто така имаше и жешка омраза кон Доналд Трамп. Скршени сме од нејзината смрт. Ја сакавме неизмерно, како и сите што ја познаваа. Таа беше вистинска сила. Незамисливо е и да се помисли на животот без неа. Но, како што велеше: ‘Секогаш сум со тебе.’“, напиша нејзиното семејство.
Актерски почетоци
Луан Рут Шедин, како што беше нејзиното целосно име, е родена во 1949 година во Портланд, каде што почнала да студира глума во Граѓанскиот театар во Портланд. Подоцна се преселила во Њујорк, а потоа во Лос Анџелес за професионално да се занимава со глума.
Своите први телевизиски улоги ги добила во 70-тите години во серии како „Човекот од шест милиони долари“, „Бионската жена“, „Компанијата на трите“ и „Неверојатниот халк“. Таа глумела и во филмовите „Ембрио“ од 1976 година, „Егзо-мен“ од 1977 година и „Шампиони: Љубовна приказна“ од 1979 година.
Улога што ја прослави
Во 1986 година, Шедин ја добила улогата на матријархот на семејството, Кејт Танер, во серијата на Ен-би-си „АЛФ“ (кратенка од „alien life form“ (вонземска форма на живот). Серијата го следи животот на едно семејство од предградието на Калифорнија кое прифатило вонземјанин откако тој се урнал во нивната гаража.
View this post on Instagram
– Снимив многу пилот епизоди пред АЛФ. Некои се емитуваа година, година и пол, некои само 12 епизоди. Но, оваа серија навистина успеа. Навистина стана хит. Беше забавно – изјавила Шедин за „ХолидејХироус БГ“ во 2015 година.
Серијата се емитуваше четири сезони, до 1990 година. Заедно со Шедин, во екипата беа и Пол Фуско (кој го позајми гласот на АЛФ, а во костими го играше Михали „Мичу“ Месарос), Макс Рајт (сопругот Вили Танер), Андреа Елсон (ќерката Лин Танер) и Бенџи Грегори (синот Брајан Танер). Рајт почина во 2019 година на 75-годишна возраст, а Грегори во 2024 година на 46-годишна возраст.
„Технички кошмар“ на снимањето
Во интервју за магазинот „Пипл“ во јуни 2000 година, таа го опиша снимањето на серијата како „технички кошмар, исклучително бавен, жежок и заморен“.
– Ако имавте сцена со АЛФ, тоа траеше цела вечност. Снимањето на една 30-минутна епизода траеше од 20 до 25 часа – рече таа тогаш.
И покрај техничките тешкотии, „АЛФ“ беше огромен успех, изнедрувајќи бројни производи, анимирана серија и ток-шоу.
– Кога излегов од собата по аудиција, се свртев кон Пол Фуско, еден од сценаристите на серијата и гласот на АЛФ. Ѝ се обратив на куклата и реков: „Мислам дека ти ќе бидеш голема, голема ѕвезда“. И бев во право, стана ѕвезда. А јас имав можност да бидам дел од таа приказна – рече таа.
View this post on Instagram
Последен поздрав
Зад себе ги остави сопругот Кристофер Барет, со кого беше во брак 55 години, ќерката Тејлор Барет, снаата Хилари Флин, сестрата Сарабет Шедин, внуката Мини Шедин, братот Роланд „Тони“ Шедин, снаата Џулијан Шедин и нејзините вдомени кучиња Ру и Ред.
Семејството ги замоли сите што сакаат да оддадат почит наместо цвеќе да донираат средства на организацијата „Хабитат за човештвото“, за која велат дека била „една од нејзините омилени добротворни организации“.
ПОЧИНА АКТЕРОТ ОД ЛЕГЕНДАРНАТА СЕРИЈА „АЛФ“: 24 години се бореше со оваа страшна болест!
