Дипломираниот архитект на престижниот универзитет во Венеција, Тарик Семси, кој е етнички Турчин по потекло од селото Коџаџик во Дебарско, испиша историја — стана првиот странец-советник во општината Венеција.

28-годишниот Тарик, кој живее во Италија, обезбеди место во 36-члениот општински совет на локалните избори во овој италијански град, како кандидат на независната листа на кандидатот за градоначалник, Симоне Вентурини, познат адвокат поддржан од италијанската десница.

-Чест ми е што станав дел од Советот на општина Венеција. Посебно сум горд што јас сум прв државјанин на Македонија и воопшто странец, кој е дел од овој оштински орган. Максимално ќе се ангажирам да ја оправдам довербата и доследно да ја претставувам нашата многубројна заедница, рече за МИА Семси, кој денеска ја потпиша изјавата за советник, додавајќи дека утре ќе биде одржана првата седница на Советот.

Новоизбраниот градоначалник, Вентурини, вели дека е горд што едно вредно момче влегува во Советот, кој ќе му биде секако добар соработник и поткрепа во работата.

– Со неговата подготвеност верувам дека ќе придонесе многу за градот Венеција и секако за многубројната македонска заедница, за нашите драги пријатели и сограѓани по потекло од Македонија. Повеќе од убеден сум дека ќе биде одличен пример за идните генерации, затоа што тој е прекрасно, вредно и одговрно момче, рече за МИА, Вентурини.

Инаку, Тарик, кој е оженет и татко на едно дете, е син на познатиот бизнисмен во Италија, Мунир Шемси, познат филантроп, кој со донации помага како во Италија, уште повеќе во матичната земја. Тој е претседател на италијанско-македонската стопанска комора „АПИ Нордес“.

Македонскиот научник Петар Поповски во Данска стана член на Кралската академија на науките и книжевноста