Интернационалната секција на музичката младина минатата седмица ја прогласи младата македонска пијанистка Инес Неделковска за музичар на неделата. Своите концертни настапи Неделковска главно ги реализира во рамките на активностите на Музичката младина на Македонија, а престижната титула ја доби за својот пијано-настап на музичкиот маратон „Осум часа љубов“, кој беше организиран од „Пијано центре“ на 6 јуни во НОБ.

Инес Неделковска (18) е млада македонска пијанистка од класата на проф. Нина Костова. Домашната критиката ја нарече „најтрофејното дете“ во Македонија. Таа е добитник на први награди на повеќе од 20 интернационални натпревари во светот (Монте Карло, Италија, САД, Франција, Велика Британија, Германија, Шпанија, Јапонија, Швајцарија, Португалија, Казахстан, Русија и други). Како победник на овие натпревари, Инес добива можност да настапува во најистакнатите светски концертни сали, како што се „Карнеги хол“ и „Кауфман центарот“ во Њујорк, „Ројал Алберт хол“ во Лондон, Театарот „Росини“ во Италија, Филхармонијата во Париз, Москва, Новосибирск, Монте Карло и многу други.

Неодамна Инес имаше три концерти во Скопје, Крива Паланка и во Струмица заедно со виолинистот Каи Орлинов од Бугарија во рамките на проектот „ЕУ со тебе“ на Делегацијата на Европската Унија.

(Текстот е објавен во „Културен печат“ број 85, во печатеното издание на „Слободен печат“ на 18-20 јуни 2021)