Македонската ракометна репрезентација вчера слета во Данска, каде што ќе ги одигра натпреварите од првата фаза на Европското првенство, а веќе денеска избраниците на Лазаров продолжија со тренинзите.

„Црвено-жолтите“ се стационирани во Силкеборг, кој ќе биде нивна база во пресрет на првите предизвици, а селекцијата веќе влезе во финалната фаза на темпирање на формата. Од стручниот штаб порачуваат дека целото внимание е насочено кон премиерниот дуел против домаќинот и еден од главните фаворити на турнирот, Данска.

Средниот бек Марко Митев истакна дека подготовките течат според планираното и дека репрезентацијата ќе влезе максимално мотивирана во првиот натпревар.

„По напорниот пат добивме ден за одмор. Утрово имавме фитнес-тренинг, а вечерва продолжуваме со работа во сала. Европското првенство започнува за три дена и целиот наш фокус е на првиот натпревар со Данска. Тие се фаворити, но наше е да дадеме максимум и да се обидеме да извлечеме добар резултат. Имаме уште неколку дена за тактичка и физичка подготовка и се надевам дека ќе можеме да го испратиме нивниот ритам“, изјави Митев.