Премиерот Христијан Мицкоски попладнево во рамки на посетата на Минхен, се сретнал со претседателот на Европскиот совет, Антонио Кошта, објави Мицкоски на социјалните мрежи.

На средбата, тој истакнал дека Македонија „останува посветена на европскиот пат и на реформите“, но и оти таа „заслужува достоинствен и принципиелен процес, базиран на европски вредности, а не на билатерални условувања“.

„Разговаравме отворено и искрено за европската перспектива на Македонија, за реформите кои ги спроведуваме и за предизвиците што стојат на патот кон полноправно членство во Европската Унија. Јасно ја пренесов нашата позиција: Македонија останува посветена на европскиот пат. Но, исто така, Македонија заслужува достоинствен и принципиелен процес, базиран на европски вредности, а не на билатерални условувања. Нашата Влада работи на суштински реформи: владеење на правото, борба против корупцијата, економска стабилност и подобар животен стандард за граѓаните. Европската иднина не е само политичка цел, таа е избор за подобра држава“, му рекол Мицкоски на Кошта.