Премиерот Христијан Мицкоски, кој како лидер на ВМРО-ДПМНЕ е на самит на Европската народна партија (ЕПП) во Брисел, информира дека партијата учествува на Самитот на Европската народна партија (ЕПП), каде во фокус ќе бидат глобалните предизвици, но и процесот на проширување на Европската Унија.

„Два дена сме овде во Брисел за да ја одбележиме 50-годишнината од формирањето на Европската народна партија, најголемата политичка сила во демократска Европа, чиј нераскинлив дел е и ВМРО-ДПМНЕ“, изјави Мицкоски.

Тој посочи дека покрај официјалната прослава, ќе се одржи и Самит на лидери од партиите членки на ЕПП, на кој ќе се разговара за клучни глобални теми.

„Ќе разговараме за економската перспектива на Европа, за глобалните предизвици, војната во Украина, состојбите во Заливот и Иран, но и за зголемување на конкурентноста“, рече Мицкоски, кој објави и дека се сретнал со хрватскиот колега, Андреј Пленковиќ.

Како што нагласи, за ВМРО-ДПМНЕ особено важна тема ќе биде проширувањето на Европската Унија, како и презентацијата на реформите што, според него, ги спроведува Владата.

„Наш посебен интерес е разговорот за проширувањето на ЕУ и постигнувањата и реформите што ги реализиравме во изминатиот период како Влада“, додаде Мицкоски.

РСЕ: Европската комисија претстави идеи за прием на нови држави во ЕУ – членките резервирани