Првата дама на САД, Меланија Трамп, изјави во средата дека останува во контакт со тимот на рускиот претседател Владимир Путин во обид да се обезбеди враќање на повеќе деца од Русија во Украина.

„Работам на тоа“, им рече таа на новинарите во Белата куќа. „Се надевам дека многу наскоро ќе имаме успех.“

Таа не сподели детали за разговорите меѓу нејзините претставници и тимот на Путин.

Како што објави Ројтерс , портпаролот на Меланија Трамп изјави дека комуникацијата меѓу двете страни продолжила откако првата дама му напишала писмо на Путин – кое нејзиниот сопруг, претседателот Доналд Трамп, лично му го доставил на рускиот претседател минатиот август – во врска со киднапираните деца од Украина.

Петнаесет деца се вратени во Украина откако Меланија Трамп ја започна својата работа, вклучувајќи седум деца во декември.

Украина ја обвини Русија за киднапирање на најмалку 19.000 деца и нивно префрлање во Русија или територии окупирани од Русија без согласност на нивните семејства или старатели, откако ја нападна Украина во февруари 2022 година. Русија постојано негира киднапирање деца од Украина, велејќи дека дејствувала за да ги заштити од борбите.

Во средата, руски и украински претставници изјавија дека имале „продуктивни“ разговори во преговорите предводени од САД, чија цел беше да се стави крај на четиригодишната војна, иако Русија претходно оваа недела ја нападна Украина со стотици беспилотни летала и рекорден број балистички ракети.

Меланија Трамп, која не се појавуваше во јавноста за време на вториот мандат на нејзиниот сопруг, во среда се сретна во Белата куќа со две од лицата киднапирани и држени како заложници од Хамас во подземни тунели во Газа, израелско-американските Кит и Авива Сигел.