Меѓународна конференција на Градежен факултет: Експертите за новите трендови за изградба на асеизмички објекти
На Градежниот факултет во Скопје в четврток, 22 јуни, ќе се одржи тематска конференција посветена на сеизмологијата, односно на најновите трендови во изградбата на објекти отпорни на земјотрес, на која ќе учествуваат реномирани професори и стручњаци од земјата и од странство.
Конференцијата е дел од серијата активности насловени „Скопско асеизмичко лето“, што ги организира Градежниот факултет на УКИМ во Скопје во соработка со Институтот за земјотресно инженерство и инженерска сеизмологија, Архитектонскиот факултет во Скопје, Друштвото на градежни конструктори на Македонија и на УНДП. Дел од тие активности, со кои се одбележува 60-годишнината од земјотресот во Скопје, е и оваа конференција насловена „4S – Skopje Summer Seismicity Stop“.
Воведни обраќања ќе имаат деканот на Градежниот факултет Горан Марковски, ректорот на Универзитетот „Св. Кирил и Методиј“ од Скопје Никола Јанкуловски и постојаниот претставник на УНДП Армен Григорјан.
Потоа со свои стручни видувања на проблематиката ќе се претстават Елена Думова-Јовановска со „Скопје – 60 години подоцна“, Васко Поповски – „Политики за вклучување на попреченоста во намалувањето на ризици од катастрофи во контекстот на Република Северна Македонија“, Полат Гулкан (Турција) – „Двата земјотреса од 6 февруари 2023 во југоисточна Турција – одбран преглед“, Жулиен Ердоган (Франција) – „Сеизмичка изолација – преглед на најновите достигнувања во сеизмичката заштита на мостовите“ и „Базна изолација – решение за заштита на зградите и на жителите во сеизмичките подрачја“, Мариана Попеску (Холандија) – „Комплексна изведба со прилагодена флексибилност“ и Томаж Пазлар (Словенија) – „Дрвени конструкции – обезбедување отпорност на земјотреси“.