„Лајка“ бара трпение од граѓаните: Глутниците кучиња низ Карпош се плашливи и тешко се заловуваат
Карпошани веќе подолг период немаат мир од глутниците кучиња низ населбите на оваа општина, особено во регионот кај Сити мол и во Тафталиџе. Граѓаните со страв се движат по улица, затоа што кучињата се агресивни, напаѓаат, а апелите до институциите досега не дадоа никаков резултат.
Препорачано
Затоа, маката со која се соочуваат најчесто ја споделуваат на социјалните мрежи приложувајќи фотографии и видеа за состојбата со кучињата на улиците, честопати алармирајќи за напади и каснувања од бездомните животни.
Вчеравечер се огласија од ЈП „Лајка“ со информација до граѓаните дека интензивно постапуваат на територијата на општината, поточно во населбите Карпош 4, Нерези и Тафталиџе 2, со цел заловување на кучињата кои во изминатиот период се групирале во поголем број.
Ја разбираме загриженоста на граѓаните и затоа вложуваме максимални напори овој проблем да биде решен во најкраток можен рок. Сепак, сакаме да појасниме дека станува збор за исклучително плашливи и диви кучиња кои избегнуваат контакт со луѓе, поради што нивното заловување бара повеќе време, трпение и повеќекратни излегувања на терен. Апелираме до граѓаните да имаат разбирање и да не преземаат самостојни активности кои би можеле дополнително да го отежнат процесот на заловување. Нашите екипи секојдневно се на терен и работат на безбедно и хумано решавање на ситуацијата – велат од „Лајка“.
Оттаму додаваат дека од повеќе граѓани добиле информации и пријави за наводни планови за расфрлање отров со цел намалување на бројот на кучињата. Најостро го осудуваме секој ваков обид.
Освен што претставува сурово и незаконско постапување кон животните, расфрлањето отров претставува сериозна опасност за јавното здравје и безбедност. Отровот може да биде фатален не само за кучињата, туку и за домашните миленици, дивите животни, па дури и за граѓаните, особено за децата кои секојдневно ги користат јавните површини. Ги повикуваме сите граѓани доколку забележат сомнителни активности или поставен отров веднаш да ги известат надлежните институции – предупредуваат од „Лајка“.
Имено деновиве по социјалните мрежи беа објавувани најави дека ќе се расфрла отров кај Сити мол, што предизвика загриженост кај граѓаните заради опасноста на која се изложени и животните и децата.
