Удар врз медиуми што го критикуваат Вучиќ: Ботски напад го собори инстаграм-профилот на „Н1“
Инстаграм-профилот на српскиот портал „Н1“ денеска беше изгасен поради координиран хакерски напад, објави „Н1“.
Препорачано
Профилите на „Слободен печат“ беа цел на координиран ботски напад — читателите масовно нѐ поддржаа
Редакцијата на „Н1“ веднаш стапила во контакт со техничката поддршка на „Мета“ и работи на итно враќање на профилот, кој со години е еден од најважните извори на доверливи и нецензурирани информации за публиката во Србија, велат од порталот.
„Ова не е изолиран инцидент, туку уште еден во низата притисоци врз слободните медиуми и граѓанските иницијативи. Во последните недели беа изгасени или компромитирани инстаграм-профилите на други медиуми, на студентски групи во блокада, а профилот на движењето ‘Крени промени’ беше отстранет пред само неколку дена – сето тоа во момент кога социјалните мрежи стануваат клучен канал за ширење информации надвор од контролата на режимот,“ се наведува во текстот.
Содржините на „Н1“ и понатаму може да се следат нивната веб-страница, како и преку официјалните профили на другите платформи како „Икс“ и „Фејсбук“.
Профилите на „Слободен печат“ беа цел на координиран ботски напад — читателите масовно нѐ поддржаа
За потсетување, официјалните профили на „Слободен печат“ на „Инстаграм“, исто така, се цел на координиран ботски напад.
Во рок од неколку секунди на 6 ноември под една објава беа испратени над 100 идентични коментари со зборот „лајк“ (like) од сомнителни профили, најмногу од странство. Истата појава продолжи и под следните објави, со стотици коментари од профили кои немаа никаква врска со нашата публика.
Здружението на новинари на Македонија (ЗНМ) поднесе официјална пријава до единиците за сајбер-криминал при МВР, откако на Инстаграм-профилот на „Слободен печат“ беа забележани сомнителни активности, нетипични коментари од неавтентични профили и нагло намалена видливост на објавите, што укажува на малициозен онлајн напад врз медиумот.
