Мароко испиша историја во Чиле, каде што селекцијата до 20 години го освои првиот светски трофеј, победувајќи ја фаворизираната Аргентина со 2-0 во финалето на Светското првенство.

Африканската репрезентација одигра зрела и дисциплинирана партија, решавајќи го натпреварот уште во првото полувреме. Херој на финалето беше Јасиф Забири, 20-годишниот напаѓач на португалскиот Фамиликао, кој ги постигна двата гола и ја запечати судбината на Јужноамериканците.

Првиот гол на Забири беше вистинско ремек-дело – маестрално изведен удар кој го отвори резултатот и го замолкна аргентинскиот табор. Само неколку минути подоцна, истиот играч ја зголеми предноста со одлична реакција во шеснаесетникот, поставувајќи 2-0, резултат што остана непроменет до крајот.

Аргентина влезе во натпреварот со амбиција да ги обедини титулите од младинските и сениорските светски првенства, но наиде на противник кој тактички и ментално беше на највисоко ниво.

Ова е првпат Мароко да стане светски шампион во младинска конкуренција, а вторпат една африканска селекција да го освои У20 Мундијалот, по успехот на Гана во 2009 година. Забири со пет постигнати голови се изедначи на врвот на листата на стрелци на турнирот, дополнително зацврстувајќи го својот статус како нова фудбалска ѕвезда во подем.

Сениорскиот успех на СП во Катар 2022 беше само почеток – младинската генерација потврди дека фудбалската иднина на Мароко изгледа светло и ветувачки.

Преземено од: Спорт.ком.мк