Марија Јаничевска предложена за директорка на ОТА
Марија Јаничевска е предлог за директорка на Оперативно-техничката агенција (ОТА) на Комисијата за прашања на изборите и именувањата. Членовите на Комисијата едногласно ја донесоа одлуката Јаничевска да биде директор на ОТА.
Предлогот го образложи претседателката на Комисијата Марија Георгиевска, која кажа дека Јаничевска е родена 1978 година во Скопје, дека била државен советник за општи работи во ОТА, како и други детали од нејзината биографија.
Георгиевска информира дека за оваа функција се пријавиле 21 лице.
Николче Крстевски и Елида Шуки се предложени за членови на Комисијата за одлучување по жалби за јавни набавки. Кирил Каранфилов е предложен за повторен мандат за претседател на оваа Комисија.
Собранието на Република Северна Македонија на седницата одржана на 5 септември 2023 година, донесе одлука за објавување јавен оглас за избор на директор на ОТА. За директор на ОТА може да биде избрано лице кое ги исполнува следниве услови: да е државјанин на Република Северна Македонија; да има стекнато најмалку 240 кредити според ЕКТС, односно VII/1 степен на образование во следниве области: информатика, електротехника, компјутерска техника и информатика, телекомуникационо инженерство, безбедност, компјутерска безбедност, правни или економски науки и да има минимум десет години работно искуство по завршување на образованието во областите предвидени во потточката 2) на оваа точка.