Mакедонската поетеса Ива Дамјановски учествуваше на поетски фестивал во Ротердам

Поетесата Ива Дамјановски на дебата во Ротердам

Познатата македонска поетеса Ива Дамјановски беше претставена на поетскиот фестивал „Poetry International“, кој се одржа од 6 до 9 јуни во Ротердам, Холандија. Фестивалот, кој е еден од најреномираните европски поетски фестивали, член на платформата „Версополис“, оваа година го имаше своето 54. издание со исклучително богата и разновидна програма, известија од НУ „Струшки вечери на поезијата“.

Ива Дамјановски настапи во главната програма, на поетското читање што се одржа во мултимедијалниот центар „Зудплејн“, каде што секој автор пред неговиот настап беше претставен со специјално создадено мултимедијално видео.

Според традицијата, Фестивалот секоја година кани различен режисер што во зависност од темата на фестивалот, осмислува сценски амбиент во кој се одвиваат настапите на поетите. Оваа година, тоа беше режисерот Пук ван Дијк во соработка со Себастијан Сминк.

Ива Дамјановски, исто така, беше дел од интерактивната и мошне интересно осмислена „просторна“ поетска дебата, каде што поетите учесници ги изразуваа своите ставови и преку просторно позиционирање на сцената.

Претставување на Ива Дамјановски во Ротердам

Главното претставување на Ива Дамјановска беше на 8 јуни во мултимедијалниот центар „Лантаренвенстер“, каде што имаше прилика во траење од половина час да прочита избор од нејзината поезија, а потоа да ги претстави нејзините поетички ставови во разговор со модератор.

Нејзиниот настап наиде на исклучително добар прием кај публиката која ја исполни салата до последното место. Инспирирани од поезијата на Ива Дамјановски, студентите од академијата „Вилијам де Кенинг“ дизајнираа специјален плакат во склоп на серијата плакати инспирани од поезијата на учесниците во главната програма на Фестивалот.

Учеството на Ива Дамјановски беше овозможено од платформата „Версополис“, која почнувајќи од 2014 година ја зголемува мобилноста и афирмацијата на младите поети во подем. Струшките вечери на поезијата се дел од „Версополис“.

Диана Чин-А-Фат и Тодорче Тасевски

Гостин на Фестивалот беше и директорот на Струшките вечери на поезијата, Тодорче Тасевски, кој оствари повеќе средби со директорите на фестивали и поетски колективи. На средбите беа разменети искуства поврзани со организацијата на фестивали и беа договорени идни потенцијални соработки.

Тодорче Тасевски, на директорката на „Poetry International“, Диана Чин-А-Фат ѝ врачи примероци од монографиите на македонските добитници на „Златен венец“, Матеја Матевски и Влада Урошевиќ. Овие монографии, во кои значителен дел од поезијата е преведен на англиски јазик, ќе бидат уште една можност за увид во творештвото на нашите двајца истакнати поети, но и прилика за холандските издавачи да пројават интерес за изданија на холандски јазик, известија од НУ „Струшки вечери на поезијата“.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот