Македонската репрезентативна голманка Јована Мицевска кариерата ќе ја продолжи во редовите на Црвена Звезда, пренесува српски „Моцарт Спорт“, наведувајќи дека белградскиот клуб веќе работи на засилување на тимот за новата сезона.

Актуелниот шампион на Србија има амбициозни планови и покрај продолжувањето на доминацијата на домашната сцена, целта е и подобар настап во европските натпреварувања, со надеж за пласман во групната фаза од Лигата на Европа.

За 24-годишната Мицевска ова би било нов предизвик во кариерата, откако претходно настапуваше за Вардар, француска Ница и романска Слатина. Последниот ангажман го имаше токму во Романија, пред привремено да се повлече од терените откако стана мајка.

Мицевска беше стандарден дел од македонската репрезентација и настапи на Европските првенства во 2022 и 2024 година.