После убедливата победа во Скопје над Луксембург, македонската сениорска репрезентација в недела од 16.00 часот во Ван против Турција ќе го игра вториот натпревар од квалификациите за пласман на Европското првентво 2024.

Турците исто така на стартот беа убедливо поразени од Португалија, но нашиот селектор Кирил Лазаров не очекува да биде лесно на утрешниот дуел кој може да биде важен за нас во остварувањето на главната цел, пласман на позициите во групата кои водат на континенталниот собир.

Лазаров на располагање ќе има 17 ракометари, за разлика од првиот меч во квалификациите, сега во националната селекција ќе биде искусното лево крило Дејан Манасков кој се враќа по опоравувањето од повредата.

На списокот овојпат нема да бидат голманот Марко Кизиќ, пивотот Марко Стојковиќ и левото крило Петар Атанасијевиќ, а повторно во составот го нема среднуот бек Марко Митев. Покрај Манасков, повикани се и Мартин Томовски, Михајло Младеновиќ и Костадин Петров.

Судии на мечот Турција – Македонија ќе бидат Радојко Бркиќ и Андреј Јусуфхоџиќ од Австрија.