Пред и официјално да се вратат возбудувањата оваа сезона во Премиер лигата, денеска играчите на Јирген Клоп го одиграа првиот натпревар после паузата поради пандемијата на коронавирус.

Екипата на Ливерпул одигра пријателски меч во кој убедливо славеше над Блекбурн со резултат 6:0. По еднаш во листата на стрелците се запишаа Мане, Кеита, Минамино, Матип, Хувер и Кларксон.

„Црвените“ со оваа победа го најавуваат шампионското славје кое треба да го потврдат во следните натпревари.

Предноста пред второпласираниот Манчестер сити е 25 бодови, а новиот дуел во најсилната англиска лига клубот од „Енфилд“ ќе го има на 21 јуни на „Гудисон парк“ против Евертон.

Доколку Манчестер сити наредната среда загуби од Арсенал, тогаш Ливерпул четири дена подоцна со победа во градското дерби ќе се промовира во нов шампион.