Сè уште актуелниот шампион, Манчестер сити, со поразот на гостувањето кај Тотенхем од 2:0 дојде на негатива од дури 22 бодови зад лидерот на табелата, Ливерпул.

„Црвените“ кои на титула во Премиер лигата чекаат дури 30 години, имаат можност да стават сол на раните на „граѓаните“ доколку триумфираат на наредните шест натпревари.

Ливерпул во следните шест кола игра против Норвич, Вотфорд и Евертон на гости, а пред своите гледачи ќе игра против Вест Хем, Борнмут и Кристал Палас и доколку триумфира на сите натпревари, што е сосема реално, тогаш во наредниот седми натпревар ќе добие шампионски шпалир кај најлутиот ривал.

Имено, по шесте натпревари, Ливерпул го очекува гостување на „Етихад“ кај Манчестер сити кој според пропозициите мора да му укаже чест на новиот шампион во Премиер лигата.