Меѓународната холдинг компанија (IHC) од Абу Даби изрази интерес за купување на средствата на руската компанија Лукоил во странство, објави денес Ројтерс, потсетувајќи дека меѓу потенцијалните купувачи се нафтените компании ExxonMobil и Chevron, како и американската приватна инвестициска фирма Carlyle. Листата на потенцијални купувачи на средствата на Лукоил во странство се проширува откако Министерството за финансии на САД ги одобри преговорите со Лукоил, кои треба да истечат на 13 декември.

Во октомври, САД воведоа санкции врз двете најголеми руски нафтени компании – Роснефт и Лукоил, што е дополнителен притисок врз Москва да ја заврши војната во Украина.

Лукоил има три рафинерии во Европа, удел во нафтени полиња во Казахстан, Узбекистан, Ирак, Мексико, Гана, Египет, Обединетите Арапски Емирати (ОАЕ) и Нигерија, и стотици бензински пумпи низ целиот свет, вклучувајќи ги и САД. IHC, предводен од шеикот Тахнун бин Зајед Ал Нахјан, брат на претседателот на ОАЕ и негов советник за национална безбедност, е конгломерат кој работи во широк спектар на области, вклучувајќи здравствена заштита, енергетика, недвижности, земјоделство и рударство, и има инвестиции во САД, Индија, Латинска Америка и Африка.

Според претставници на компанијата, IHC би можел да инвестира од 30 до 35 милијарди долари во текот на 18-месечен циклус, финансирајќи ги своите инвестиции преку комбинација од долг и капитал.