Фолкодин, опиоиден лек кој се користи за сува кашлица кај деца и возрасни се повлекуваат од македонскиот пазар и од пазарот на Европската Унија по препорака на ЕМА, потврдуваат од Агенцијата за лекови и медицински средства МАЛМЕД за „Слободен печат“.

Лековите што содржат фолкодин беа предмет на два безбедносни прегледи во ЕУ во 2011 година и во 2022 година поради потенцијален ризик дека фолкодинот може да доведе до анафилакса. Резултатите од 2011 година биле поволни, но во 2022 година студија покажала поврзаност меѓу употребата на фолкодин и ризик од анафилакса. Затоа во декември 2022 година, Комитетот за проценка на ризик од областа на фармаковигиланцата при Европската агенција за лекови ги процени конечните резултати и не можеше да идентификува популација на пациенти за кои придобивките од лековите што содржат фолкодин би можеле да ги надминат неговите ризици. Затоа, се укинува решението за ставање во промет на овие лекови и потребно е да се советуваат да го прекинат лекувањето со лекови што содржат фолкодин.

Македонската агенција за лекови и медицински средства МАЛМЕД за „Слободен печат“ потврди дека и во Македонија се спроведува ова решение и дека овие лекови со фолкодин веќе не се достапни во аптеките. Во случај на анестезија, на здравствените работници им се препорачува да проверат дали пациентите користеле фолкодин последните 12 месеци и ако е така, да бидат свесни за анафилакса.

МАЛМЕД повикува секој сомнеж за несакана реакција од лекот да се пријави во Националниот центар за фармаковигиланца при Агенцијата за лекови и медицински средства.

Употребата на фолкодин во рок од 12 месеци пред анестезија со невромускулни блокирачки агенси е поврзана со ризик од перианестетичка анафилактична реакција. Не се идентификувани ефикасни мерки за минимизирање на овој ризик кај пациенти кои биле изложени на лекови што содржат фолкодин. Лекарите треба повторно да ги проценат своите пациенти, да разгледаат други алтернативи за лекување и да ги советуваат пациентите да престанат да го користат лекот.