Легендата на Мексико го брани Меси: Лео е добар човек, дресот беше мој
Многу бурни реакции во јавноста предизвика ситуацијата со Меси и дресот на Мексико во соблекувалната по натпреварот помеѓу овие две селекции во кои Аргентина славеше со 2:0.
Еден од првите кои се огласи беше мексиканскиот боксер Канело Алварез кој дури и му се закани на Аргентинецот, но сега во одбрана на Меси застана и легендата на Мексико Андрес Гвардадо.
Гвардадо против Аргентина се запиша во историјата како шести фудбалер со пет Светски првенства, а само трет Мексиканец на кого му успеало вакво нешто.
„Добро знам каков човек е Меси. Луѓето како Канело Алварез не знаат ништо за тоа што се случува во соблекувалната. Таму е полно со пот и сите дресови се на подот, небитно дали се ваши или оние кои сте ги размениле. За мене е лудост што се направи од еден таков нормален момент. Дресот кај Меси е мој, Лео и јас ги сменивме по натпреварот“, изјави Гвардадо.
Претходно со слична изјава во јавноста се огласи и Серхио Агуеро, меѓутоа сигурно дека изјавата на Гвардадо има поголема важност за сите Мексиканци.