Полска се соочува со серија лажни дојави за пожари или други закани, вклучително и една вчера во стан во Гдањск што му припаѓа на член на семејството на претседателот Карол Навроцки, изјави премиерот Доналд Туск.

Туск денеска наутро одржа седница на Владиниот центар за безбедност по инцидентот, за кој рече дека е дел од неодамнешна серија вакви лажни повици.

Министерството за внатрешни работи соопшти дека во текот на ноќта центарот за итни повици добил пријава за пожар во стан. Службите биле испратени на локацијата, а пожарникарите одлучиле насилно да влезат во станот што му припаѓа на член на семејството на Навроцки.

„Станот беше проверен и не беше утврдена опасност од пожар, ниту повредени лица, бидејќи просториите беа празни. Поради ситуацијата, полицијата спроведува истрага за да ги идентификува сторителите“, изјави портпарол на Министерството за внатрешни работи.

Туск го нарече инцидентот „уште една телефонска провокација“ и рече дека, иако пожарникарите постапиле правилно, треба да се преиспитаат процедурите за препознавање вакви лажни дојави, а сторителите мора што поскоро да бидат идентификувани.

„Постапките на провокаторите се насочени против националната безбедност. Против сите нас. Ќе ги употребиме сите достапни методи за да ги идентификуваме и уапсиме саботерите, без разлика од каде доаѓаат или кој ги насочува“, напиша тој на социјалната мрежа „Икс“.