Лазаревски: Имавме глупави грешки во првите 10 минути и Германија веднаш направи 4-5 гола предност
Македонската ракометна сениорска репрезентација со вториот пораз на Европското првенство ги загуби шансите за пласман во главната фаза.
Повторно голем број на грешки беа направени и против вториот фаворит во групата „А“, селекцијата на Германија која немилосрдно казнуваше и константно доаѓаше до реализација.
Последната шанса за позитивен резултат на ова ЕП избраниците на селекторот Кирил Лазаров ќе ја имаат во вторник од 18.00 часот во „Мерцедес-Бенц Арена“ во Берлин против Швајцарија.
Еден од пивотите во нашата селекција, Милан Лазаревски два пати се запиша во листата на стрелците против Германците:
– Имавме неколку глупави грешки во првите 10 минути и Германија речиси веднаш направи четири или пет гола предност. Потоа, не бевме толку лоши, но ни требаше предолго да влеземе во игра. Кога Германија е во позитива, има толку големо искуство што на другиот тим му е тешко да биде рамноправен – рече Лазаревски по завршувањето на мечот.