Денеска најдобрата македонска машка ракометна репрезентација загуби во второто коло во прелиминарната фаза на Европското првенство во групата „А“ од домаќинот Германија со резултат 34:25 (18:13).

Со овој втор пораз на континенталниот собир нашите најдобри ракометари ги загубија шансите за пласман во главната фаза.

Тешко беше да се игра против германската селекција која беше предводена од одличниот Кнор кој запиша девет погодоци, а и беше бодрена од многубројната публика во „Мерцедес-Бенц Арена“ во Берлин.

Кај нас најефикасен беше Ненад Костески со шест голови, а по четири имаа Пешевски и Јагуриновски.

Единствено на стартот успеавме да израмниме на 1:1, а при негатива од 5:4 противникот направи серија од 4:0.

Германците ја одржуваа ваквата предност, а во текот на првото полувреме достигнаа и највисоки „плус седум“ (16:7).

Ништо не се промени во второто полувреме, едноставно ривалот ја казнуваше секоја наша грешка, немилосрдно постигнуваше голови во нападот. Најголемата разлика достигна „плус девет“, за на крајот на семафорот да стои конечни 34:25.

Последниот меч на ова ЕП избраниците на селекторот Кирил Лазаров ќе го имаат на 16 јануари од 18.00 часот против Швајцарија која претходно ремизираше со Франција.