Се одигра првиот натпревар од второто коло во групата „А“ на Европското ракометно првенство, Франција и Швајцарија одиграа нерешено 26:26.

Франција, еден од фаворитите на континенталниот собир не ја оправда фаворитската улога со оглед на високата победа против Македонија и убедливиот пораз на Швајцарците против Германија на стартот од прелиминарната фаза.

Во текот на првото полувреме се менуваа водство двете репрезентации, имајќи најмногу по „плус два“ позитива, а на одмор се замина со резултат 14:14.

Во вториот дел Французите водеа константно, дојдоа до позитива од највисоки „плус четири“ (20:16, 21:17).

Но, швајцарските ракометари не се предаваа, при негатива од 24:21, врзаа три голови во низа. Во својот последен напад имаа и шанса да дојдат до триумфот, но не успеаја да реализираат.

Лаубе во швајцарската репрезентација постигна девет голови, а за Франција седум запиша Мем.

Швајцарија е последниот ривал на Македонија во третото последно коло од групата, а овој натпревар е закажан за 16 јануари во Берлин со почеток од 18.00 часот.