Лани играше во летната НБА лига, сега е во МЗТ Скопје
Македонскиот шампион МЗТ Скопје го донесе првото засилување за новата сезона, кошаркар кој има носено НБА дрес. Кениецот Нуни Омот (24 год, 206 см), е нов кошаркар на МЗТ Скопје Аеродром откако денеска потпиша договор до крајот на сезоната.
Станува збор за исклучително квалитетен крилен центар, кој може да игра и на крилната позицијата и според експертите, Нуни Омот е играч со огромен потенцијал и нема да биде чудо доколку во блиска иднина заигра и во НБА лигата. Тој веќе има искуство со настапи за НБА екипи. Минатата година Нуни Омот настапи на пет средби во летната лига за Голден стејт вориорс, а потоа беше дел од тренинг кампот на Бруклин нетс.
Омот минатата сезона ја помина во развојната Г лига и за вториот тим на Бруклин одигра 44 натпревари на кои постигнуваше просечно по 5.5 поени и два скокови. Претходно, имаше и повеќе од солидна универзитетска кариера во дресот на Бејлор универзитетот за кого во последната сезона во НЦАА лигата на 34 средби имаше просек од 9.9 поени и 3.6 скока.
Кениецот стана осмиот кошаркар кој во моментов е под договор со МЗТ Скопје Аеродром, откако претходно беа ангажирани Кристијан Николов и Бојан Крстевски, а беа обновени договорите со Андеј Магдевски и Андреј Маслинко. Активен договор со шампионот имаат уште Дамјан Стојановски, Марко Симоновски и Ранко Мамузиќ.