Тринаесетгодишен ученик, денеска наутро, пред почетокот на наставата, во ходникот со нож ја нападнал својата професорка по француски јазик во училиште во местото Трескоре Балнеарио кај италијанскиот Бергамо , објави Кариере.

Наставничката Киара Мочи (57) се здобила со тешки повреди на вратот и градниот кош и итно со хеликоптер била пренесена во болницата Папа Џовани XXIII, каде што била оперирана.

Нападот се случил околу 7:45 часот во институтот Леонардо Да Винчи. Момчето од 3. А одделение во училиштето дошло облечено во маица со натпис „одмазда“ и маскирни панталони. Кај себе имало нож што го понело од дома, а во ранецот му бил пронајден и воздушен пиштол.

Ученикот веднаш по нападот бил совладан од професор и двајца училишни работници и предаден на италијанските карабинери. Истрагата за мотивот на нападот сè уште трае, но властите соопштија дека случајот не е поврзан со тероризам и дека станува збор за изолиран инцидент, пишува Кориере дела Сера.

Бидејќи момчето има 13 години, според италијанскиот закон не е кривично одговорно, но малолетничкото државно обвинителство ќе отвори предмет за да се утврдат сите околности.

Од болницата соопштија дека операцијата траела два часа и дека наставничката е сместена на одделение за интензивна нега, додека прогнозата и натаму е внимателна. Сепак, италијанскиот министер за образование Џузепе Валдитара изјавил дека разговарал со болницата и дека професорката не е животно загрозена.

Напаѓачот околу вратот имал и мобилен телефон, за кој се наведува дека требало да го сними нападот.

Наставата во училиштето е прекината, а на учениците им е обезбедена психолошка помош. Родителите и колегите ја опишуваат професорката како примерна, сериозна и посветена наставничка, додека од синдикатот ЦИСЛ порачаа дека станува збор за чин „невидена тежина“ и дека се потребни поголем број стручен кадар, психолошка поддршка во училиштата и конкретни мерки за спречување на насилството.

Осудени родителите на момчето-убиец од „Рибникар“, таткото доби 14, а мајката 3 години затвор

13-годишно дете прегазило друго дете со кола во Арачиново, тешко го повредило