Криминалци од Виетнам шверцувале дрога во паста за заби
Полицијата во Виетнам уапси 65 лица поврзани со шверц на 50 килограми дрога – некои скриени во паста за заби, пренесува „Би-Би-Си“.
Тоа уследи по минатомесечните апсења на четворица вработени на „Виетнам ерлајнс“ кај кои била пронајдена дрога во пастата за заби која им ја нашле во рачните торби по летот од Париз до Хо Ши Мин. Тие рекле дека биле ангажирани да транспортираат 60 килограми паста за заби, но не знаеле дека во нив има екстази, кетамин и кокаин.
Виетнам е главен центар за трговија со дрога и покрај тоа што има некои од најстрогите закони за дрога во светот. Половина од 327 туби за паста за заби кои стјуардесите ги превезувале содржеле дрога. Инспекторите рекле дека жените не биле свесни за тоа што имало во тубите.
Полицијата оваа недела соопшти дека 65-те осомничени биле уапсени откако откриле уште шест пратки со наркотици кои се шверцувале во Виетнам по истиот пат. Наводно тие биле насочени од истиот шверцерски синџир што ги ангажирал стјуардесите. 65-те осомничени се под истрага за различни обвиненија, вклучително и купување, продавање, транспортирање и складирање на наркотици, објавија локалните медиуми.
Полицијата се сомнева дека истиот синдикат често користел виетнамски државјани кои студирале и живееле во Франција за да внесат дрога во земјата. Откако дрогата ќе пристигнела на виетнамските аеродроми, домашните услуги за испорака ги транспортираат до соучесник во провинцијата Донг Наи, која се граничи со Сајгон.
Дрогата потоа се транспортирала до повеќе локалитети за дистрибуција.
Властите велат дека количината на дрога запленета преку воздушните линии во земјата во текот на изминатите три месеци ја надмина количината на дрога шверцувана преку воздух во последните пет години заедно.
Градот Хо Ши Мин е особено атрактивна транзитна точка за шверцерите поради неговата близина до соседна Камбоџа.
Оние кои се осудени во Виетнам за поседување или шверц на повеќе од 600 грама хероин или повеќе од 2,5 килограми метамфетамин се соочуваат со смртна казна. Со смрт се казнува и производство или продажба на нелегални наркотици над одредени количини.