Издавачката куќа „Артконект“ од Скопје неодамна го објави романот „Шаги Бејн“ од шкотско-американскиот писател Даглас Стјуарт. Ова е неговиот прв роман и за него авторот ја добива престижната награда „Букер“ за 2020 година и стекнува светска слава, а романот е преведен на повеќе од четириесет јазици.

Раскажан едноставно и низ детска перспектива „Шаги Бејн“, сепак, истовремено е и комплексна и длабока книга во поглед на темите и мотивите што ги разработува. Дејството се случува во 1981 година, кога Глазгов тоне во економска и социјална криза.

Приказната започнува со младата Агнес Бејн, која со своите три деца и сопругот е принудена да се пресели во малиот стан на своите родители. Борејќи се со сиромаштијата, депресијата и насилството на кое е секојдневно изложена, Агнес сè повеќе сфаќа дека никогаш нема да го живее животот што го посакува.

Нејзиниот најмал син, Шаги, е единствениот што сонува дека љубовта, сепак, може да го спаси неговото семејство. Неговото соочување со реалноста и согледувањето на светот каков што навистина е го прават „Шаги Бејн“ трогателен и незаборавен роман во кој љубовта и разочарувањето, очајот и надежта длабоко се преплетени.

„Светот на Шаги Бејн е свет на, речиси, неподнослива болка наспроти која стои безусловната љубов“, напиша „Њујорк тајмс“.

Книгата е објавена во рамки на проектот „Соочување со неизвесноста: современа европска литература“ што издавачката куќа „Артконект“ го реализира со поддршка на програмата „Креативна Европа“ на ЕУ. Преводот е на Ацо Пероски.

(Текстот е објавен во „Културен печат“ број 329, во печатеното издание на весникот „Слободен печат“ на 18-19.4.2026)