„Комити“ и Муцунски: Фудбалскиот клуб Вардар добива нов спортски терен во Аеродром
На иницијатива на градоначалникот на Општина Аеродром Тимчо Муцунски и претседателот на Советот на општината Дејан Митески, фудбалскиот клуб Вардар ќе добие нов спортски терен во Аеродром каде ќе може да ги одржува подготовките, натпреварите и тренинзите.
Градоначалникот Тимчо Муцунски на својата фејсбук страна информираше дека денеска одржа средба со навивачката група „Комити”, која од неодамна е и сопственик на клубот.
Притоа потенцираше дека на истата се разговарало за иницијатива поврзана со спортскиот терен лоциран во непосредна близина на СЦ „Јане Сандански”.
– ФК Вардар е име кои има долга традиција, гордост на Македонија и македонскиот спорт, а ние на ваков начин даваме силна и недвосмислена поддршка за клубот. Oчекувам по завршување на соодветната законска постапка, овој спортски терен да биде ставен на располагање за потребите на навивачите и клубот. Да го поддржуваме македонскиот спорт и да се радуваме на нови успеси – напиша Муцунски во својата објава.
Скопските „црвено-црни“ се обидуваат годинава да се вратат во Првата македонска лига, моментно се третопласирани во второлигашкиот шампионат.