Колумбискиот претседател го суспендираше примирјето со најголемиот нарко картел во земјата
Колумбискиот претседател Густаво Петро изјави дека го суспендирал примирјето со најголемата криминална организација во земјата, Клан дел Голфо, бидејќи ја нападнала полицијата.
„Им наредив на вооружените сили повторно да ги активираат сите воени операции против кланот дел Голфо“, објави Петро. „Нема да дозволиме да продолжат да сеат вознемиреност и ужас во заедниците“.
Неколку минути подоцна Петро на „Твитер“ напиша: „Нападот со пушка врз полицијата од страна на Клан дел Голфо го нарушува прекинот на огнот… Вооружените сили мора веднаш да дејствуваат против мафијашката организација“.
He ordenado a la Fuerza Pública reactivar todas las operaciones militares contra el Clan del Golfo. Se suspende el cese bilateral con este grupo al margen de la ley. No permitiremos que sigan sembrando zozobra y terror en las comunidades.
— Gustavo Petro (@petrogustavo) March 19, 2023
Прекинот на огнот со колумбискиот нарко картел беше дел од напорите да се стави крај на внатрешниот конфликт во Колумбија во кој загинаа најмалку 450.000 луѓе.
Неколку дена претходно, во радио интервју на 13 март, Петро ја обвини групата за уништување на општински аквадукт во провинцијата Антиокија за време на блокади на патиштата поврзани со протестите на неформалните рудари за злато. Петро рече дека групата го „прекршила прекинот на огнот“ и дека нема можност за преговори доколку продолжат со нападите.