Секторот за услуги е главен двигател на економскиот раст во Европската Унија по пандемијата на коронавирусот, велат податоците објавени денес од Евростат. Овој сектор во септември и октомври оваа година бил за 16,4 проценти повисок отколку во февруари 2020 година, непосредно пред избувнувањето на пандемијата. Растот на производството во индустријата во споменатиот период бил значително помал и изнесувал 2,3 проценти, во трговијата само 0,1 процент, а во градежништвото 0,2 проценти.

Економијата на Европската Унија беше силно погодена за време на првиот бран на пандемијата, со остри падови во сите главни сектори помеѓу февруари и април 2020 година.

Индустриското производство потоа падна за 27,3 проценти, градежништвото за 26,7 проценти, трговијата за 22,3 проценти, а услугите за 17 проценти, според веб-страницата на Евростат. Потоа следеше период на закрепнување, а приближно една година подоцна нивоата на производство се вратија на вредностите пред пандемијата- пишува Бизнис телеграф.

На почетокот на 2022 година, трендовите се разидоа, бидејќи индустријата, градежништвото и трговијата почнаа да стагнираат или малку да опаѓаат, додека секторот на услуги продолжи со постојан раст, станувајќи главен двигател на целокупната економска активност во Европската Унија.