Со 23 гласа за и три воздржани, за нов претседател на Пливачката  федерација на Северна Македонија (ПФСМ) е избран Горан Стојановски.

Стојановски беше избран на денешното Собрание на ПФСМ на кое учествуваа 21 од вкупно 32 регистрирани клубови кои не се задоволни од работата на досегашниот претседател Александар Маленко.
Право на глас имаа клубовите кои настапија на летното државно првенство и тоа во поединечна конкуренција и во штафетните трки.
Претходно, како прва точка на Собранието, клубовите едногласно го разрешија Маленко.

Клубовите го свикаа годишното Собрание на ПФСМ бидејќи мандатот на поранешниот претседател Маленко му е истечен, а истото е свикано според законот за Здружение на граѓани, но и според Статутот на ПФСМ.

На Собранието прво беше избрано работно претседателско кое го водеше истото, а нејзиниот член Александар Филипчев, истакна дека му била доставена покана и на Маленко, но неговиот одговор бил дека Собранието ќе го закаже во февруари идната година. Потоа клубовите со 23 гласа за и три воздржани го избраа Горан Стојановски да биде нов претседател на ПФСМ.

– Најзаслужен за ова Собрание е Маленко поради чија работа трпеа пливачите и клубовите. Јас како претседател ќе се потрудам да го решам најголемиот проблем на федерацијата, да се одблокира сметката, а потоа ќе ја зајакнеме соработката со МОК, АМС како и со ФИНА и со ЛЕН. Целта е да имаме Федерација која ќе застане на нозе и клубовите и пливачите да мислат само на резултатите – порача новиот претседател на ПФСМ, Горан Стојановски.

На Собранието присутен беше и спортскиот директор на Македонскиот олимписки комитет, Владимир Богоевски, кој го следеше изборот на новиот претседател, Горан Стојановски.