Клоп: Мундијалот во Катар ќе се игра во погрешно време од погрешни причини

Менаџерот на Ливерпул, Јирген Клоп/фото: EPA-EFE/RUNGROJ YONGRIT

Менаџерот на Ливерпул, Јирген Клоп смета дека Светското првенство во Катар кое ќе се одржи од 21 ноември до 18 декември  ќе се одржи во погрешно време и ќе се игра од погрешни причини, а жртви се фудбалерите.

Германецот смета дека е потребно да се организира состанок на кој ќе присуствуваат ФИФА, УЕФА, националните федерации и Лигите на кој би се зборувало за самите фудбалери кои се најважниот дел од овој спорт.

– Ова Светско првенство ќе се игра во погрешно време од погрешни причини. Но, се е во ред – вели Клоп.

Ливерпул сезоната во Премиер лигата ја започнува денеска со гостувањето кај Фулам (13.30 ч.), а Клоп смета дека сезонава ќе претставува еден вид на маратонска трка и во кој фудбалерите ќе бидат изложени на големи напори поради долгите сезони во националните лиги, во европските купови и поради Мундијалот кој за прв пат во историјата ќе се игра во зима.

– Вториот дел од сезоната дефинитивно не е спринт бидејќи првиот натпревар по Мундијалот во Катар ќе го играме на 26 декември. Ако сите играчи имаат пауза, не е проблем, напротив тоа е добро. Додека работев во Германија имавме четири недели зимска пауза. Но, сега СП се игра сред сезона и луѓето кои одлучуваат за тоа велат дека тоа е направено поради „вистински причини“ и тоа е тоа. Но, ако сте фудбалер и стигнете до полуфиналето на СП, веќе имате премногу натпревари, премногу работа, а сезоната ви продолжува за само седум дена. Секогаш кога зборувам за ова, јас станувам лут. Мојот проблем е што како и сите други, знам дека тоа е погрешно, но никој не зборува за тоа дека нешто треба да се менува – додава Клоп.

Видео на денот