Ријалити ѕвездата Клои Кардашијан откри дека на своите деца не им дозволува пристап до интернет и социјални мрежи и дека не брза со нивното вклучување во онлајн светот. Во најновата епизода од својот поткаст „Khloé in Wonder Land“, 41-годишната ѕвезда зборуваше за воспитувањето на тригодишниот син Татум и седумгодишната ќерка Тру, кои ги има со поранешниот партнер Тристан Томпсон, пишува „Пипл“.

Таа истакна дека, иако децата се свесни дека нивната мајка е славна личност и дека ѝ е пријатно пред камерите, немаат никаков пристап до интернет.

„За нив е нормално да ги гледаат папараците. Чудно е, но тоа е за нив нормално. Немаат социјални мрежи. Немаат достапен интернет на кој било начин. Моите деца немаат пристап до Гугл. Значи, не знаат ни што значи тоа“, изјави таа.

Додаде дека смета оти децата на нивна возраст не треба да бидат изложени на социјалните мрежи.

„Тоа е едноставно поинаков свет. Кога ќе бидат доволно возрасни, ќе сфатат. Не верувам дека децата треба да бидат на социјални мрежи. Не мора да знаат за интернетот“, рече Кардашијан.

Таа откри и дека нејзината ќерка всушност не знае што е Тикток.

„Мојата ќерка ќе каже: ’Сакам да снимам Тикток‘ Не знаат што е тоа затоа што никогаш не зборувам за Тикток. Мислат дека значи видео со танц, па снимаме како танцуваат и се забавуваат. Не знаат ништо за трендовските звуци освен ако јас нешто не им покажам“, додаде таа.

Зборувајќи за тоа кога Тру би можела да го добие својот прв мобилен телефон, ѕвездата од ријалити шоуто „Кардашијан“ изјави дека размислува да ѝ купи телефон за нејзиниот „златен роденден“, кога на 12 април 2030 година ќе наполни 12 години.

„Тоа не значи дека ќе добие социјални мрежи. Тоа значи дека ќе добие телефон. Би сакала децата да немаат социјални мрежи барем до 16 или 17 години, но за телефон размислуваме за нејзиниот 12-ти роденден“, нагласи таа.

Кардашијан првпат стана мајка во април 2018 година со раѓањето на ќерката Тру, додека нејзиниот син Татум е роден во јули 2022 година. И покрај прекинот на врската, таа и Томпсон, како што претходно изјави, успеале да одржат одличен однос.