Британскиот „The Post Office“ веќе 16. година по ред ја истражува понудата на европските градови, кои за вложените пари даваат најдобри туристички услуги. Оваа година, сончевиот Лисабон во Португалија е избран за најисплатлив и најповолен град за продолжен викенд.

Врз основа на својот буџет, секој турист сака да ја добие најдобрата понуда на избраната дестинација. Истражувањето, објавено од тимот на „The Post Office“, се однесува на трошоците за продолжен викенд престој во кој било од европските градови, што вклучува две ноќевања во хотели со три ѕвезди. Трошоците се однесуваат за разгледување на знаменитостите на градот, цената на храната, пијалоците и јавниот превоз.

Според истражувањата, Лисабон, главниот град на Португалија, е прогласен за најевтино место во Европа.

Цените во португалската престолнина не се под големо влијание на инфлацијата и зголемените трошоци. Тие се пониски во просек за една третина од најскапите европски градови, како што се Париз (Франција), Амстердам (Холандија) и Венеција (Италија).

Барселона (Шпанија) , Лондон (Велика Британија), Рим (Италија), Единбург (Шкотска), Мадрид (Шпанија), Даблин (Ирска) и Берлин (Германија) се, исто така, меѓу најскапите градови во Европа.

Лисабон е интересна туристичка дестинација, град сместен во необичен ридски предел со прекрасни погледи. Се смета за еден од најстарите градови во светот, а според легендата се верува дека го основал Одисеј, кој се враќал од Тројанската војна.

Покрај Лисабон, на листата со најевтини градови за туристичка посета се најдоа и Вилнус (Литванија), Краков (Полска), Атина (Грција), Рига (Латвија), Порто (Португалија), Загреб (Хрватска), Будимпешта (Унгарија), Варшава (Полска) и Лил (Франција).